ការទិញរថយន្ត Toyota Corolla ប្រភេទមួយទឹកនៅកម្ពុជាអាចជាជម្រើសឆ្លាតវៃសម្រាប់អ្នកទិញរថយន្តជាច្រើន។ Toyota Corolla ជារថយន្តដែលមានប្រជាប្រិយភាពខ្លាំងក្នុងប្រទេសនេះដោយសារតែភាពទុកចិត្តបាន, តម្លៃសមរម្យ, និងសម្បូរគ្រឿងបន្លាស់។ ទោះយ៉ាងណា ការទិញរថយន្តមួយទឹកត្រូវប្រុងប្រយ័ត្ន និងស្វែងយល់លម្អិតដើម្បីធានាមិនទិញរថយន្តខុស។ ក្នុងអត្ថបទនេះនឹងផ្ដល់គន្លឹះចំនួន ៦ជំហានដល់លោកអ្នក ជាជំនួយក្នុងការស្វែងរកទិញរថយន្ត Toyota Corolla មួយទឹក៖
គន្លឹះទី១៖ តើនរណាគួរទិញរថយន្តនេះ?
អ្នកដែលគួរទិញមានដូចជា៖
+អ្នកទើបទិញរថយន្តលើកទី១៖ មនុស្សដែលកំពុងស្វែងរករថយន្តដែលមានតម្លៃសមរម្យ និងអាចទុកចិត្តបាន។
+អ្នកធ្វើដំណើរប្រចាំថ្ងៃ៖ អ្នកចង់បានរថយន្តដែលស៊ីប្រេងតិច និងងាយស្រួលថែទាំ។
+ម្ចាស់អាជីវកម្ម៖ អ្នកជំនួញដែលត្រូវការរថយន្តប្រភេទសេដានដែលថោក និងមានប្រសិទ្ធភាព។
+គ្រួសារ៖ អ្នកដែលត្រូវការរថយន្តមានសុវត្ថិភាព និងទំហំធំសម្រាប់ប្រើប្រាស់ប្រចាំថ្ងៃ។
+អ្នកបើកបរសេវាកម្ម Grab និង PassApp)៖ អ្នកដែលត្រូវការរថយន្តថ្លៃសមរម្យ និងអាចប្រើប្រាស់បានយូរ។
គន្លឹះទី២៖ តើអ្វីដែលត្រូវពិនិត្យពិចៃនៅពេលទិញរថយន្តនេះ?
ពេលទិញត្រូវពិនិត្យលើ៖
+ឆ្នាំផលិត៖ គួរជ្រើសរើសម៉ូដែលដែលមានអាយុក្រោម ១០ឆ្នាំ ព្រោះអាចលក់ចេញវិញក្នុងតម្លៃល្អមិនងាយធ្លាក់ថ្លៃ។
+ចំនួនចម្ងាយបើកបររបស់រថយន្ត៖ គួររើសរថយន្តដែលមានចំនួនគីឡូតិច ព្រោះបានន័យថា រថយន្តនោះមានការប្រើប្រាស់តិច។
+សភាពរថយន្ត៖ គួរពិនិត្យមើលម៉ាស៊ីន, ប្រព័ន្ធបញ្ជា, សំបកកង់, និងបរិក្ខារខាងក្នុងរថយន្ត។
+ប្រវត្តិគ្រោះថ្នាក់៖ ស្នើសុំទៅអ្នកលក់ ឬហាងដែលលក់អំពីរបាយការណ៍ប្រវត្តិរថយន្ត ដើម្បីពិនិត្យមើលថា តើរថយន្តធ្លាប់រងការខូចខាតធ្ងន់ធ្ងរឬទេ?
+ឯកសារបញ្ជាក់កម្មសិទ្ធិ៖ បញ្ជាក់អំពីលិខិតចុះបញ្ជី និងព័ត៌មានរបស់ម្ចាស់ដើម។
+ហាងឆេងនៅលើទីផ្សារ៖ ស្រាវជ្រាវតម្លៃរថយន្ត Toyota Corolla ម៉ូដែលផ្សេងៗដើម្បីចៀសវាងទិញរថយន្តដែលតម្លៃថ្លៃជ្រុល។
គន្លឹះទី៣៖ តើពេលណាជាពេលល្អបំផុតដែលគួរទិញរថយន្ត Toyota Corolla មួយទឹក?
ការកំណត់ពេលវេលានឹងអាចជួយអ្នកអោយសន្សំថវិកាបានច្រើន ហើយខាងក្រោមនេះជាគន្លឹះខ្លះ៖
+ពេលចុងឆ្នាំ៖ តម្លៃអាចថោកជាងធម្មតា ព្រោះឱ្យហាងលក់រថយន្តលាងឃ្លាំងមុនចូលដល់ឆ្នាំថ្មី។
+ក្រោយថ្ងៃបុណ្យជាតិធំៗ៖ តម្លៃអាចធ្លាក់បន្ទាប់ពីបុណ្យជាតិធំៗរបស់ខ្មែរដូចជា៖ បុណ្យចូលឆ្នាំខ្មែរ ឬបុណ្យភ្ជុំបិណ្ឌ។
+រដូវកាលដែលរថយន្តមិនសូវមានទីផ្សារ៖ ចៀសវាងរដូវកាលដែលមានការប្រកួតប្រជែងខ្លាំងនៅលើទីផ្សារ។
+ពេលមានម៉ូដែលថ្មីចេញមក៖ តម្លៃម៉ូដែលចាស់អាចធ្លាក់នៅពេលរថយន្ត Toyota Corolla ម៉ូដែលថ្មីចេញលក់។
គន្លឹះទី៤៖ កន្លែងណាខ្លះដែលអាចរកទិញរថយន្ត Toyota Corolla មួយទឹកនៅកម្ពុជា?
ជារួម គឺមានកន្លែងច្រើនដែលលោកអ្នកអាចរកទិញរថយន្ត Toyota Corolla ដូចជា៖
+ហាងលក់រថយន្ត៖ គួរទិញនៅតាមហាងល្បីៗ ឬហាងលក់រថយន្តណាដែលមានការធានាត្រឹមត្រូវ។
+ទិញតាមអនឡាញ៖ គេហទំព័រលក់រថយន្ត ដូចជា៖ Khmer24.com, Libertycarz.com និងនៅតាម Facebook Marketplaceជាដើម។
+រថយន្តលក់ឡៃឡុងរបស់អង្គភាព-ស្ថាប័នរដ្ឋមួយចំនួន៖ គួរទិញរថយន្តដែលលក់ក្នុងតម្លៃធូរៗតាមរយៈការលក់ដេញថ្លៃរបស់អង្គភាព ឬស្ថាប័នរដ្ឋមួយចំនួនបាន។
+អ្នកលក់ផ្ទាល់ខ្លួន៖ អាចរកបានតម្លៃថោកជាងតាមហាង ប៉ុន្តែត្រូវពិនិត្យឱ្យល្អិតល្អន់មុននឹងទិញ។
+ទីផ្សារលក់រថយន្តមួយទឹក៖ ភាគច្រើនសម្បូរនៅភូមិសាស្រ្តដូចជា៖ ខណ្ឌទួលគោក និងខណ្ឌសែនសុខ រាជធានីភ្នំពេញ។
គន្លឹះទី៥៖ ហេតុអ្វីត្រូវទិញ Toyota Corolla ដៃពីរនៅកម្ពុជា?
មូលហេតុដោយសារតែរថយន្តនេះមានអត្ថប្រយោជន៍ដូចជា៖
+ភាពទុកចិត្តបាន៖ រថយន្តមានគុណភាពល្អ និងប្រើបានយូរ។
+តម្លៃសមរម្យ៖ តម្លៃរថយន្តដៃពីរថោកជាងរថយន្តថ្មី។
+ថែទាំងាយស្រួល៖ ផលិតផ្នែកបម្រើមានច្រើន និងថោក។
+ប្រើប្រាស់ប្រេងតិច៖ ល្អសម្រាប់អ្នកធ្វើដំណើរច្រើន។
+តម្លៃលក់ចាស់មិនធ្លាក់ច្រើន៖ តម្លៃលក់ក្រោយល្អជាងម៉ាកផ្សេងៗ។
+ងាយស្រួលជួសជុល៖ ជាងជួសជុលរថយន្តភាគច្រើននៅកម្ពុជាចេះជំនាញជួសជុលរថយន្តម៉ាកនេះច្បាស់។
គន្លឹះទី៦៖ របៀបទិញ Toyota Corolla ដៃពីរនៅកម្ពុជា?
+កំណត់ផែនការថវិកា៖ កំណត់ថវិកាសរុប ដែលរួមបញ្ចូលការចុះបញ្ជី, ប្រាក់ពន្ធ, ធានារ៉ាប់រង, និងការជួសជុល។
+ពិនិត្យមើលហាងឆេងទីផ្សារ៖ ប្រៀបធៀបទំនិញ តម្លៃ និងទីតាំងលក់រថយន្ត។
+ពិនិត្យរថយន្ត៖ ពិនិត្យលើម៉ាស៊ីន ប្រព័ន្ធបើកបររថយន្ត និងផ្នែកខាងក្នុងរថយន្ត។
+ផ្ទៀងផ្ទាត់ឯកសារ៖ ពិនិត្យមើលឱ្យល្អិតល្អន់ដើម្បីធានាថា រថយន្តមានឯកសារត្រឹមត្រូវច្បាស់លាស់។
+ចរចាតម្លៃ៖ ចរចាតម្លៃដោយផ្អែកលើការស្រាវជ្រាវរបស់អ្នកទិញផ្ទាល់។
+ការបង់ប្រាក់ និងផ្ទេរកម្មសិទ្ធិ៖ ធ្វើលិខិតទិញ-លក់ និងផ្ទេរកម្មសិទ្ធិតាមផ្លូវច្បាប់។
+ចុះបញ្ជី និងទិញប័ណ្ណធានារ៉ាប់រង៖ បង់ពន្ធ និងទិញធានារ៉ាប់រងរថយន្ត។
តើរវាងរថយន្តToyota Corolla មួយទឹកជាមួយនឹងរថយន្ត Toyota Camry មួយទឹកម៉ូឌែលមួយណាដែលល្អជាង?
នៅពេលនិយាយអំពីការទិញរថយន្តមួយទឹករថយន្តរបស់ក្រុមហ៊ុន Toyota ដែលរួមមាន៖ រថយន្ត Toyota Corolla និង Toyota Camry គឺជាជម្រើសដ៏ពេញនិយមបំផុតសម្រាប់អ្នកទិញ។ ម៉ូឌែលទាំងពីរមានកេរ្តិ៍ឈ្មោះល្អចំពោះទំនុកចិត្ត តម្លៃសមរម្យ និងការប្រើប្រាស់បានយូរ។ ទោះបីជាយ៉ាងណា ប្រសិនបើអ្នកកំពុងសម្រេចចិត្តរវាងរថយន្ត Toyota Corolla និង Toyota Camryថា តើគួរតែទិញមួយណា? ខាងក្រោមនេះជាចម្លើយ៖
និយាយពីតម្លៃសមរម្យ៖ រថយន្ត Toyota Corolla មានតម្លៃទាបជាង
អត្ថប្រយោជន៍ធំបំផុតនៃការជ្រើសរើស Toyota Corolla ប្រើប្រាស់ជាង Toyota Camry ប្រើប្រាស់ គឺតម្លៃសមរម្យ។ Toyota Corolla ជារថយន្តសេដានទំហំតូច ខណៈពេលដែល Toyota Camry ជារថយន្តសេដានទំហំមធ្យម ដែលមានតម្លៃថ្លៃជាង។ ប្រសិនបើអ្នករកទិញរថយន្តកម្រិតថវិការ គឺរើសយក Toyota Corolla ជាជម្រើសល្អបំផុត។
និយាយពីការសន្សំសំចៃប្រេង៖ Toyota Corolla ប្រើប្រាស់ប្រេងតិចជាង
អត្ថប្រយោជន៍ដ៏សំខាន់មួយទៀតនៃ Toyota Corolla គឺប្រសិទ្ធភាពសន្សំសំចៃប្រេងល្អ។ ដោយសារវាមានទំហំតូច និងមានទំងន់ស្រាលជាង Toyota Camry, Corolla ប្រើប្រាស់ប្រេងតិចជាង។ រថយន្ត Toyota Corolla ប្រើប្រាស់ភាគច្រើនអាចបើកបានប្រមាណ ៣០-៤០ ម៉ាយក្នុងមួយហ្គាឡុង (MPG) ខណៈពេលដែល Camry មានទំហំធំជាង ប្រមាណ ២៥-៣៥ MPG។ ប្រសិនបើអ្នកចង់បានរថយន្តដែលអាចសន្សំប្រេងបានក្នុងអំឡុងពេលប្រើប្រាស់ Toyota Corolla គឺជាជម្រើសល្អជាង សម្រាប់ការបើកបរក្នុងទីក្រុង និងការធ្វើដំណើរប្រចាំថ្ងៃ។
និយាយពីថ្លៃថែទាំ និងជួសជុល៖ Toyota Corolla មានតម្លៃទាបជាង
ទាំង Toyota Corolla និង Toyota Camry មានកេរ្តិ៍ឈ្មោះល្អចំពោះទំនុកចិត្ត ប៉ុន្តែការថែទាំ Toyota Corolla មានតម្លៃសមរម្យជាង។ ថ្លៃគ្រឿងបន្លាស់ដូចជា ហ្វ្រាំង សំបកកង់ និងគ្រឿងម៉ាស៊ីន មានតម្លៃទាបជាង Toyota Camry។ លើសពីនេះ ថ្លៃធានារថយន្តសម្រាប់ Toyota Corolla គឺមានតម្លៃទាបជាងផងដែរ ដោយសារវាមានទំហំតូច និងតម្លៃទីផ្សារទាប។ ដូច្នេះសម្រាប់អ្នកចង់បានរថយន្តដែលមានការចំណាយថែទាំទាប Toyota Corolla គឺជាទុនវិនិយោគដ៏ល្អ។
និយាយពីកម្លាំងម៉ាស៊ីន និងផាសុកភាព៖ Camry មានកម្លាំងខ្លាំងជាង ខណៈCorolla អាចប្រើប្រាស់បានសាមញ្ញជាង
ប្រសិនបើអ្នកចង់បានរថយន្តដែលមានកម្លាំងម៉ាស៊ីន និងកន្លែងអង្គុយទូលាយ Toyota Camry អាចជាជម្រើសល្អជាង ព្រោះវាមានម៉ាស៊ីនធំជាង និងផ្តល់ភាពផាសុកភាពក្នុងផ្នែកខាងក្នុង។ ទោះយ៉ាងណា ប្រសិនបើអ្នកចង់បានរថយន្តដែលងាយស្រួលបើក Toyota Corolla គឺជាជម្រើសល្អ។ វាមានទម្ងន់ស្រាល និងងាយស្រួលបើកបរ ជាពិសេសក្នុងទីក្រុង និងកន្លែងចង្អៀត។ ទោះបីជាវាមិនមានកម្លាំងខ្លាំងដូច Toyota Camry ប៉ុន្តែវានៅតែផ្តល់នូវការធ្វើដំណើរល្អនិងរលោង។
និយាយពីតម្លៃលក់បន្ដ៖ ទាំងពីរម៉ូឌែលមានតម្លៃលក់បន្ដល្អ ប៉ុន្តែ Corolla មានអត្ថប្រយោជន៍លើសបន្តិច
Toyota Corolla និង Toyota Camry ទាំងពីរមានតម្លៃលក់បន្ដខ្លាំង ដោយសារកេរ្តិ៍ឈ្មោះល្អនៃ Toyota ចំពោះភាពធន់ និងអាយុកាលប្រើបានយូរ។ ប៉ុន្តែ Toyota Corolla មានតម្លៃលក់បន្ដល្អជាងតិច ពីព្រោះវាមានតម្លៃសមរម្យ និងពេញនិយមក្នុងទីផ្សាររថយន្តប្រើប្រាស់។ អ្នកទិញភាគច្រើនចង់បាន Toyota Corolla ដែលបានថែរក្សាល្អ ជាង Toyota Camry ដែលមានតម្លៃថ្លៃជាង។
តើអ្នកគួរជ្រើសរើសរថយន្តណាក្នុងចំណោមរថយន្តទាំងពីរនេះ?
ប្រសិនបើអ្នកកំពុងស្វែងរករថយន្តមានតម្លៃសមរម្យ សន្សំសំចៃប្រេង និងសេវាថែទាំថោក Toyota Corolla គឺជាជម្រើសល្អជាង។ វាសមស្របសម្រាប់អ្នកមានថវិការដែលកំណត់ អ្នកបើកបរប្រចាំថ្ងៃ និងអ្នកទិញឡានលើកដំបូង។ ប៉ុន្តែ ប្រសិនបើអ្នកត្រូវការកន្លែងទូលាយជាង កម្លាំងម៉ាស៊ីនខ្លាំង និងផាសុកភាពកាន់តែច្រើន Toyota Camry អាចជាជម្រើសសម្រាប់អ្នក។ ទោះយ៉ាងណា ក្នុងចំណោមភាពប្រកួតប្រជែង Toyota Corolla មានលក្ខណៈអាចប្រើប្រាស់បានច្រើន និងមានតម្លៃសមរម្យជាង៕
