ក្រុមហ៊ុនផលិតរថយន្តអគ្គិសនីរបស់ប្រទេសចិន គឺក្រុមហ៊ុន BYD បានចេញផ្សាយការកើនឡើងប្រាក់ចំណូលរបស់ខ្លួនប្រមាណ ១១.៥% ដែលជាប្រាក់ចំណូលសុទ្ធនៅត្រីមាសទីបីនៅថ្ងៃពុធសប្ដាហ៍នេះ ខណៈដែលមានការយកចិត្តទុកដាក់ខ្លាំងពីរដ្ឋាភិបាលចិន។
ប្រាក់ចំណូលសុទ្ធរបស់ក្រុមហ៊ុន BYD បានកើនឡើងដល់ ១១.៦ ពាន់លានយ័ន (១.៦៣ ពាន់លានដុល្លារ) នៅអំឡុងពាក់កណ្ដាលខែកក្កដា និងខែកញ្ញា ឆ្នាំមុន នេះបើតាមបញ្ជាក់របស់ក្រុមហ៊ុនក្នុងការបង្ហាញអំពីផ្សារភាគហ៊ុន។ ប្រាក់ចំណេញសុទ្ធរបស់ BYD សម្រាប់៩ខែដំបូង បានកើនឡើង ១៨.១% ពោលកើនដល់ ២៥.២ ពាន់លានយ័ន។
គិតត្រឹមត្រីមាសទីបី ក្រុមហ៊ុន BYD បានកើនឡើងប្រាក់ចំណូល ២៤% ជារៀងឆ្នាំ រហូតដល់ ២០១.១ ពាន់លានយ័ន (២៨.២៤ ពាន់លានដុល្លារ) ដែលប្រាក់ចំណូលត្រីមាសរបស់ BYD បានកើនលើសប្រាក់ចំណូលក្រុមហ៊ុន Tesla ជាលើកដំបូង ខណៈដែលប្រាក់ចំណូលរបស់ Tesla សម្រាប់ពាក់កណ្ដាលខែកក្កដា និងខែកញ្ញា បានត្រឹម ២៥.២ ពាន់លានដុល្លារប៉ុណ្ណោះ។ ទោះជាយ៉ាងណាក្រុមហ៊ុន Tesla នៅតែនាំមុខលើក្រុមហ៊ុន BYD ក្នុងការលក់រថយន្តអគ្គិសនីទូទាំងពិភពលោកដដែលចន្លោះខែកក្កដា ដល់ខែកញ្ញា។
អត្រារថយន្តរបស់ក្រុមហ៊ុន BYD មានប្រមាណជាងមួយភាគបីនៃការលក់រថយន្តអគ្គិសនី និង Plug-in Hybrid នៅប្រទេសចិនក្នុងឆ្នាំនេះ បានបំបែកកំណត់ត្រាលក់ប្រចាំខែនៅខែកញ្ញា ឆ្នាំ២០២៤ ហើយអត្រាលក់ប្រចាំត្រីមាសរបស់ BYD ក៏កើនដល់កម្រិតខ្ពស់ថ្មីផងដែរ។
ក្រុមហ៊ុនក្នុងស្រុករបស់ចិនមួយនេះ និងក្រុមហ៊ុនដទៃ ដូចជាក្រុមហ៊ុន Tesla បានទទួលអត្ថប្រយោជន៍ពីយុទ្ធសាស្ត្រ និងគោលនយោបាយរដ្ឋាភិបាលចិន ដែលតម្រូវឱ្យផ្លាស់ប្ដូររថយន្តចាស់ៗជាមួយរថយន្តប្រើប្រាស់អគ្គិសនី។ កាលពីខែមុន ការលក់រថយន្តនៅចិនបានធ្លាក់ចុះរយៈពេល ៥ខែដោយសារការជំរុញលើការឧបត្ថម្ភដល់អតិថិជន។ នេះបើតាមរបាយការណ៍ឧស្សាហកម្មរបស់ចិន។
BYD vs Tesla: ប្រាក់ចំណូលរបស់ក្រុមហ៊ុន BYD កើនឡើងដោយសារអ្វី?
នៅចុងខែតុលា មានអ្នកដាក់ពាក្យចូលប្រើប្រាស់អត្ថប្រយោជន៍ដែលជាគោលនយោបាយរបស់រដ្ឋាភិបាលចិនសរុបដល់ទៅប្រមាណ ១.៥៧ លាននាក់ ដែលផ្តល់ជូនរហូតដល់ ២,៨០០ដុល្លារក្នុងការផ្លាស់ប្ដូររថយន្តចាស់ជាមួយរថយន្តប្រើអគ្គិសនី។
ជាពិសេស អាជ្ញាធរចិនក៏បានផ្តល់ការបញ្ចុះតម្លៃបន្ថែមដល់ ២០,០០០យ័នដល់អ្នកទិញរថយន្តអគ្គិសនី តាមរយៈកម្មវិធីដែលនឹងផុតកំណត់នៅចុងឆ្នាំនេះ។
ក្រុមហ៊ុន BYD បានស្ទុះដោយផ្តល់ការបញ្ចុះតម្លៃខ្លាំងលើម៉ូដែលដែលលក់ដាច់បំផុតរបស់ខ្លួន។ រថយន្តដែលលក់ដាច់ខ្លាំងបំផុត ជាប្រភេទរថយន្ត Plug-in Hybrid ដែលបានកើនឡើង ៧៥.៦% ជារៀងឆ្នាំ ពោលរហូតដល់ ៦៨៥,៨៣០ គ្រឿង ក្នុងត្រីមាសទីបី ដោយសារតែបច្ចេកវិទ្យា Plug-in Hybrid ជំនាន់ថ្មី ដែលសន្សំសំចៃប្រេងឥន្ធនៈបានច្រើនជាង។
យោងតាមប្រៀបធៀប ការលូតលាស់ក្នុងការលក់រថយន្តអគ្គិសនីសុទ្ធ (ដែលមិនមែនជាប្រភេទរថយន្ត Hybrid) របស់ BYD មានការកើនឡើងយឺតប្រមាណ ២.៧% ពោលប្រមាណ ៤៤៣,៤២៦ គ្រឿងក្នុងត្រីមាសនេះ ដោយសារមានក្រុមហ៊ុនប្រកួតប្រជែងផ្សេងទៀតនៅប្រទេសចិន។ នេះបើតាមការប៉ាន់ប្រមាណរបស់ទីភ្នាក់ងារសារព័ត៌មាន Reuters។
យ៉ាងណាមិញ ក្រុមហ៊ុន BYD នៅតែឈរជាក្រុមហ៊ុនដែលលក់រថយន្តបានច្រើនប្រមាណជាង ៩០% នៃរថយន្តរបស់ខ្លួននៅចិន ហើយក៏បានកំណត់គោលដៅក្នុងការលក់ប្រចាំឆ្នាំឱ្យខ្ពស់ជាងមុនក្នុងឆ្នាំនេះ។ នេះបើតាមរបាយការណ៍ Morgan Stanley ចេញផ្សាយក្នុងខែកញ្ញា។ លើសពីនេះ ក្រុមហ៊ុន BYD មានគោលដៅជំរុញការនាំចេញឱ្យបានដល់ ៤៥០,០០០ គ្រឿងក្នុងឆ្នាំ២០២៥នេះ ដែលជាការកែសម្រួលចុះពីគោលដៅ ៥០០,០០០ គ្រឿងដែលបានកំណត់នៅខែមីនា ឆ្នាំមុន។
ក្រុមហ៊ុន BYD កំពុងបន្តការចូលទីផ្សារអឺរ៉ុប ទោះបីជាប្រឈមនឹងការកើនឡើងបញ្ហាពន្ធក៏ដោយ ដោយបានលក់រថយន្ត ៩៤,៤៧៧ គ្រឿងនៅប្រទេសតំបន់អឺរ៉ុប ក្នុងត្រីមាសទីបី ដែលកើនឡើង ៣២.៦% បើប្រៀបធៀបនឹងឆ្នាំមុន៕
