រថយន្ដអគ្គិសនី Tesla Model Y ទទួលបានការផ្លាស់ប្ដូរមុខមាត់ថ្មី សម្រាប់ឆ្នាំថ្មី២០២៥ នេះតែម្ដង ដែលជាម៉ូឌែលរថយន្ដមានឈ្មោះកូដហៅថា Juniper កាលពីពេលកន្លងមក និងបានលេចធ្លាយកាលពីពេលថ្មីៗនេះដែរ។ ពេលនេះក្រុមហ៊ុន Tesla បានដាក់បង្ហាញជាផ្លូវការហើយ ក៏មានការពង្រឹងបន្ថែមលើផ្នែកខាងក្នុង ក៏ដូចជាការបើកបរផងដែរ។
រូបរាងខាងក្រៅរបស់រថយន្ត Tesla Model Y
សម្រាប់ភ្លើងចង្កៀងទាំងខាងមុខ និងខាងក្រោយរបស់ Tesla Model Y ត្រូវបានប្រើប្រាស់ម៉ូតតភ្ជាប់គ្នា ស្រដៀងទៅនឹងរថយន្ដ Cybertruck និង Cybercab ដែរ ដោយមានលក្ខណៈបែបអនាគតម្យ៉ាង។ រថយន្ដ Tesla Model Y ស៊េរីថ្មីនេះមានប្រវែងវែងជាងមុនបន្ដិចចំនួន 41mm សរុបត្រឹម 4792mm ជាមួយកង់ 20” ហើយក៏មានជម្រើសកង់ 19” ដូចគ្នា។
ផ្នែកខាងក្នុងរបស់រថយន្ត Tesla Model Y
ផ្នែកខាងក្នុង Tesla Model Y មានអេក្រង់ 15.4” នៅពីខាងមុខ ដែលជាទំហំធំជាងជំនាន់មុន ក៏ដូចជាមានអេក្រង់ទំហំ 8” សម្រាប់អ្នកអង្អុយនៅពីខាងក្រោយ ជាមួយបាសបំពងសំឡេងសន្យាថា នឹងផ្ដល់ជូនសំឡេងកាន់តែពិរោះជាងមុនទៀត។ Tesla បាននិយាយប្រាប់ថា ប្រព័ន្ធអេរ៉ូឌីណាមិកត្រូវបានពង្រឹងបន្ថែមប្រសើរជាងមុន ឱ្យស្របនឹងខ្យល់បានកាន់តែល្អនៅពេលបើកបរ ក៏ដូចជាផ្ដល់ជូនសំឡេងសំបកកង់ស្ងាត់ជាងមុនដូចគ្នា។ ជាពិសេសទំហំទីតាំងអង្គុយរបស់រថយន្ត Tesla Model Y ផ្ដល់ភាពងាយស្រួលមិនចាញ់ប្រភេទរថយន្ត SUV ផ្សេងៗឡើយ។
ល្បឿនរបស់រថយន្ត Tesla Model Y
រថយន្ដ Tesla ថ្មីនេះមានម៉ូឌែលស្ដង់ដារ RWD (593km) ជាន់ពី 0km/h ទៅ 100km/h ក្នុងរយៈពេល 5.9 វិនាទី និងម៉ូឌែលប្រវែងឆ្ងាយ AWD (719km) ជាន់ពី 0km/h ទៅ 100km/h ក្នុងរយៈពេល 4.3 វិនាទី ជាមួយល្បឿនបើកបរលឿនបំផុត 201km/h ទាំងពីរ។ ការបញ្ចូលថ្មរបស់ Tesla Model Yវិញ នឹងប្រើប្រាស់កម្លាំង 250kw Supercharging ដោយព័ត៌មានលម្អិតបន្ថែម Tesla នឹងប្រាប់នៅពេលក្រោយៗទៀត។
តម្លៃរបស់រថយន្ត Tesla Model Y
នៅប្រទេសចិន Tesla ដាក់លក់ Model Y នៅក្នុងតម្លៃចាប់ពី $35,935 ឡើងទៅសម្រាប់ម៉ូឌែល RWD និងតម្លៃ $41,390 សម្រាប់ម៉ូឌែល AWD ផងដែរ។
គួួររម្លឹកថា ក្នុងឆ្នាំ ២០២៤ រថយន្តអគ្គិសនី Tesla Model Y បានក្លាយជារថយន្តដែលលក់ដាច់បំផុតនៅក្នុងប្រទេសចិន ដោយមានចំនួនលក់សរុប ៤៨០ ៣០៩ គ្រឿង កើនឡើង ៥,២៤ភាគរយ បើប្រៀបធៀបនឹងឆ្នាំ២០២៣ ដែលលក់បានចំនួន ៤៥៦ ៣៩៤ គ្រឿង ប៉ុណ្ណោះ ជាមួយតម្លៃលក់ចាប់ពី ៣៤ ១០០ ដុល្លារ។
ជាមួយគ្នានេះ រថយន្តអគ្គិសនី BYD Qin Plus ដែលជាគូរប្រកួតប្រជែងមួយរបស់ Tesla Model Y ក៏មានចំនួន លក់ប្រហាក់ប្រហែលនឹង Tesla Model Y ផងដែរ ពោលគឺមានចំនួន ៤៨០ ០២៥ គ្រឿង ដោយគ្រាន់តែខ្វះ ២៨៤ គ្រឿង ប៉ុណ្ណោះ។
យោងតាមការបង្ហោះនៅលើផេកហ្វេសប៊ុកផ្លូវការរបស់ក្រុមហ៊ុននាំចូលរថយន្ត Tesla ប្រចាំនៅកម្ពុជា បានឱ្យដឹងថា រថយន្ត Tesla Model Y នឹងមកដល់កម្ពុជានៅអំឡុងខែមីនានេះ។ ប៉ុន្តែចំពោះតម្លៃ ក្រុមហ៊ុននាំចូលមិនទាន់បានបញ្ជាក់នៅឡើយទេ៕
